Kial tiom da orgenoj sur mia paĝo ? - povas iu demandi. Vere strange. Laŭ profesio mi estas elektroenergetikisto.
Dum la lernojaroj 1945-52 mi tamen frekventis la muziklernejon kaj finis plenan tiutempan sepjaran bazan edukadon en la klaso de fortepiano. Plu mi ne lernis ĉar mi komencis lernadon en faka mezlernejo kaj vere malestis tempo por paralela lernado en muzika mezlernejo. Tamen en nia loĝejo estis piano kaj mi sufiĉe multe ĝin ludis. Tio ĉi finiĝis kiam en 1966-a jaro mi akiris propran loĝejon... Piano restis en la patra loĝejo kaj bezonis ĝin mia malpliaĝa fratino.
Fine de 1985 jaro mi vizitis mian fratinon kiu tiutempe laboris en paroĥio en urbeto apudmontara kiel orgenistino kaj kateĥistino. Ĉe ŝi mi trovis libron traktantan pri konstruo de orgenoj. Ŝi montris al mi "sian" orgenon en la preĝejo, mi iom ludis ĝin laŭ pianmaniero. Tio funkciis!
Mi komencis iradi al diversaj preĝejoj, aŭskultis, pririgardadis orgenojn, interparolis kun la orgenistoj. Estiĝis multaj fotoj unue nigra-blankaj, poste koloraj. Eĉ mi sukcesis konatiĝi kun kelkaj vroclavaj orgenkonstruistoj. De unu el ili mi povis pruntepreni kelkajn detalajn librojn pri konstruo kaj riparado de orgenoj.
Mi amikiĝis kun kelkaj orgenistoj kiuj permesis iom orgenludi kiam la meso finiĝis. Mi ne aspiras esti bona orgenludanto, nur mi tion faras por plezuro. Tamen - unufoje mi ludis plenan meson - kiam mia fratino nepre devis samtempe okupiĝi pri alia preĝeja afero. Nu - mi esperas, ke denove mi ne devos! Ĝi ne estas io por mi!
Dumtempe mi kolektis aron da fotoj kaj priskriboj de orgenoj, plejparte en Pollando, kelkajn ankaŭ en Estonio. Priskribojn de polaj orgenoj mi aperigis en la paĝo < www.organy.art.pl > .
Ĉar mi ne havas aŭtomobilon - miaj nunaj "orgenaj ekskursoj" certagrade limiĝas al maloftaj forveturoj foje tien, foje alien. Mi devas aldoni ankoraŭ ion: ĉiu orgeno estas konstruita por iu difinita loko kaj ĉiu estas alia. Malestas du samaj. Ĉiun do oni pririgardas kiel io tute nova, alia.
Pro ĉio supre skribita - tiom da fotoj kun komuna titolo: "Orgeno".