Laŭ mia scio en Vroclavo troviĝas ĉirkaŭ 90 preĝejojn de diversaj konfesioj. Ĉar ili plejparte estas historiaj monumentoj kaj - estas simple belaj - mi volonte ilin vizitas kaj ne foriras sen iu foto. Mi kalkulis parkere kiom da preĝejoj estas konstruitaj konforme al la arkitekturaj stiloj. Do - da gotikaj mi kalkulis 27 kaj 4 kiuj dum pasintaj tempoj perdis sian sakralan rolon. Estas 6 preĝejoj neogotikaj konstruitaj ekde mezo de 19-a ĝis komenco de la 20-a jarcento.

Estas nur 5 barokstilaj. Oni diras, ke kiam komenciĝis modo je barokaj preĝejoj - oni konstatis ke en la urbo estas tiom da preĝejoj, ke ne estas bezone konstrui novajn. Prefere oni reornamis internojn de ekzistantaj gotikaj preĝejoj laŭ baroka stilo(altaroj, skulptaĵoj).

Estas dekkelkaj preĝejoj konstruitaj dum komenco de la 20-a jarcento laŭ diversaj branĉoj de modernisma stilo.

Kaj fine - post la milito, nur ekde 1970-aj jaroj oni permesis, iom post iom, kun grandaj obstakloj, ekkonstrui tute novajn preĝejojn. Ilia arkitekturo estas tre diversa, ili estas (laŭ mia privata opinio) kaj belaj kaj simple - malbelaj. Sed ĉiuj plenumas sian taskon.

Ankaŭ aliaj, krom romkatolika eklezio havas en la urbo siajn preĝejojn kaj preĝosalonojn. Menciinda estas barokstila sinagogo "Sub Blanka Cikonio". Tiujn diversajn preĝosalonojn mi ve vizitis, ne ĉiuj troviĝas sur la urba listo de sakralaj objektoj. Kaj - estas ankaŭ kelkaj kapeloj en hospitaloj. Tiujn ankaŭ mi ne vizitis.

Havante jam la interesiĝon pri preĝejoj - mi ja ne neglektas la okazon pririgardi kaj foti preĝejojn en aliaj urboj kiujn mi vizitas.

Tiel estiĝis dekoj da fotoj, kiujn laŭpove mi ĉi tie montras.

Restas ankaŭ alia afero ligita kun preĝejoj: la orgenoj. Ne en ĉiu preĝejo estas interesanta min ŝalma instrumento. Sed tiujn mi prifotis - en Vroclavo - eble ĉiujn.

Sed orgenoj - estas jam tute alia rakonto.