Cando penso que te fuches,

negra sombra que me asombras

ao pe dos meus cabezales

tornas facéndome mofa.

Cando maxino que és ida

no mesmo sol te me amostras,

i eres a estrela que brilla,

i eres o vento que zóa.

Si cantan es ti que cantas,

si choran, es ti que choras,

i es o murmurio do río,

i es a noite. i es aurora.

En todo estás e ti es todo

pra min, i en min mesmo moras,

nin me deixaras ti nunca,

sombra que sempre me asombras.