Pri skoro misec don bi je u Zološken na Marjanu festivol od vune. Nažalost radi posla i štajuni nison dospi puoć. Bi san kurijožast da vidin ča činidu i da naučin čaguod novega (a storega). Pri por don san hodi u Split i paso priko Marijana neka mi je bi skruoz priko rukie. Posli puno godišć paso san kroz zološki, ćakulajuć sa judima obo beštijima. Ponudi san se za dogodine ko čo buden mogo dat ruku... Nison jemo na pamieti ča bi to moglo bit, ma promislit ću, jemo vrimena. Puno tega se kroz život nauči, a dobar dil tega sestavi nidir u možjone di je tieško noć, noročito ako ti je od tega malo ili nikako potriba po se na to se zaboravi. Ničesa se sitiš onako diguod usput: Hodi san vidit Brnetovu kućicu u Drinsko brca. Rašundro se kruov po štropu po san išo vidit ča se do učinit, kako san pogledo i iznutra vidi san obišene povroze.

Povroze se danas nojčešće čini od kaiša, diguod od kadiene, ritko od konopa a pri su se činili od driva i to somo jednie vrsti driva: smrdieja. Zoč? To nison nikad nikoga pito, kuo zno bi mi pokuojni Borba zno to reć, ma učini je puno veće od tega: nauči me kako se činidu povrozi. Istinu govorieć prvo dvo ča san učini nisu bili za duperat: prvi je mogo bit braculjet a drugi je bi ne za brove nego pri za telića :) Kad san prviega učini posli je već bilo lako, ma je isto lašnje stavit kaiš i dobro ga fermat tako da nison učini povroz jemo bare kvarat vika. A sad bi mogo ponovo. Vajo noć komod rovnega smrdieja, izdilot ga da grie niz drivo jer drugačije kad ga ideš savinut somo će se rascipat.

Kad san već kolo povrozi moran imencovot i pokuojnega barba Ivu Žuvića... Bili su uon i Jadran skupa sa Borbon mi na Foru sa brovima. Stoli su u jednuon kućici u Bogomojskin Siecima a jo san sto skupa sa njima kad san hi išo vidit za zimske praznike. Smrkne se navrime, nuoć dugaška a somo lanpijun i šterika uz komin i svakakve ćakule. Koće se već spominjot kako se duošlo do razgovora obo muodi ma je barba Ivo Žuvić vrhunski prokomentiro: "Muoda ti je od danas do sutra, koda ni čo mislidu kako je boje nego nikien pode čaguod napamet a onda svi poludidu za tin. Evo možeš dat škomešu da ako staviš povroz na jednu mlodu, šesnu curu i pošješ je u sr' lita priko pjace u Foru (mistu) sutra bi mogo na tu istu pjacu prodat stuo povrozi jer bidu svi tili pratit muodu...
Somo toliko za danas, a ovi ča san hi spuomenu a nisu više sa nami neka počijedu u miru!