Na Broču rič koju svi znodu i kojo u puno svita tiro vodu nazube. Većina svita vonka našega lipega škoja nezno obo čemu je rič. Istini za voju ču san da sličnu spizu parićojedu i u Grškon i u Gruziji, a za Argentinu i Patagoniju se ni ni čudit, ko je malo Bročani tamo išlo a tamo jemo i janjoc. Mislin se kako daje i dolo mi je u smih, sad mi vajo opisat ča je vitalac a oni koji ovo moredu normalno proštit, ti i znodu ča je a oni drugi niećedu inako razumit ni bože tebe. Ma gren izpočietka:

Da bi parićali vitalac, a rodi se obo spizi tribo van jemat žigericu (jetra, pluća, slizina, srce a moredu i bubrizi), zduor i čriva, sve od jonca, rožonj (more bit drveni od smriča ili gluhoča, a more bit i gvozdeni) i žerave... Žigericu lipo iskidote na komadiće da budu slične veličine i ne veliki, nataknete na rožonj , posolite i stavite peć. Kad se okrojci ispečedu (vajo stot atiento da ne izgoridu) nuožon hi otkrojite na pijat i to je početak jićo da se morete bokun napit dokle sedite kraj uognja. Ako bi se držali stori užonci onda se to do dici, tako je bare bilo u mojon fameji, meni dokle san bi moli Borba bi uvik rizuco pomalo i dovo. Kad ste to učinili zamotote okolo napola pečene žigerice zduor i onda lipo namotote čriva, tako da hi pasojete izmeju dvo prsta, da bi ako je čo ostalo unutra izošlo vonka, ponovo posolite i nemojte žalit jer će se suol ocidi kako se bude zduor krovi... Kad sve namotote morete odma nabadot čriva ili hi morete badot kako se budu naduvali dokle se pečedu, da van ne ispučedu. Ko i žigericu pečete na žeravi dokle se ne zarumeni i morete jist.

Evo sad na kraju vidin da san zaboravi nojvažnije ča tribo za dobar vitalac uz lipo vino tribodu van i dobri priateji. Virujte mi da ga parićojen čiesto, a nikad u životu mi ni palo napamet parićat ga somo zose... Kakvi je to vitalac bez kunpanije, ni gušta ni šušta u njemu... Zato fola priatejicami i priatejima ča su me kunpanjali do sada i od sada u vitalcima!