E kad jo napišen Brkata onda znon i kako to proštit, to je ime za brdo u puodnije od Hunca na kojien su grške gomile. Za rozliku od ženie sa brcima prvuo "a" u Brkati -brdu sa gomilami, je dugaško i uzlazno, da su puna justa riči, ma nison radi tega ovo poče pisat.

Brkata je u našen molen mistu dobro znona, svi znodu da se za Veli Pietak grie "Priko Brkate"; isto onakvo procesija ko ča je na Foru "put za križen" somo ča našu ne snimo televizija i ne pratidu je novinari, a i boje je tako, ko oće hodit za pokoru ili za gušt neka grie, ko nieće neka leži doma uteplo.

Brkatu se poznaje i po gomilami, velima gomilami, ča su naši stori govorili da su to grške gomile jer su hi grodili grci kad su bivali vuda, danas se zno da su hi grodili ili Iliri ili nikuor i pri njih ali in neznomo ime. Našima a i meni je dobro i ime grške gomile taman da je iljadu puti krivo. Tie gomile na vrh Brkate su i visoke i široke. Dvi su jedna spored druge i one su visoke, prima istoku su spojene sa jednuon basjon gomilon kojo je odizgor poravnota šavuricon. One tri činidu potkovu kojo zatvoro molu pijačicu. Od zopada tu pijačicu zatvorodu basje gomile kroz kojie su napravjeni puti za pasovat po njima, na mista ti puti finijedu sa okruglin gumnon, a iz pijace se moglo somo na jedno misto izoć bez pentrat se priko gomil, portun je bi izmeju vele gomile od puodneva i basjega dila prima zopadu. Ovie gomile se rozlikujedo od svih mistih na kojima su Iliri jemali gradine ( mista na vrh brda opasona debelin zidon... ) Na zopod od gomil je nikad sa zidon bila ogrodjena pijaca kojo je i danas prilično rovna, na burnu bondu tie pijace je jedon krug od stinjo , manji i mogo bi bit gumno ali ni baš u šestu Hunčonskih gumnih, tako da jo volin mislitt da je to bilo misto di su sedili i ćakulali, ili je to bilo vilinskuo kolo di su vile igrale za da bude dobra godina. Bilo bi lipo kad bi se slikolo Brkatu sa gomilami odizgora i onda sve to nacrtolo na kortu, posli tega bi vajalo proračunat kako je sunce hodilo pri por iljod godišć ili sve to viezat na grodce koji se vididu sa Brkate i onda govorit ča bi to moglo bit. brž i mi jemomo "Zvjezdano Selo" ali ne na Mosoru nego na Brkati i starije por iljod godišć.

Jemo još jedna stvor viezona za gomile kojo mi do mislit da Brkata ni bila selo nego ništo veće. Rodi se o jami koju su po priči kopali Hunčani za iskopat zlotni zvuon koji je zaokpon ispod gomil. U guornjen dilu te jame prima gomilami jemo jedon procip koji, kako mi je reko jedon priatej kad smo hodili gore, pari ko monda (da me skužote ko tu rič ne kapi: ko piška). I onda je ona mogla bit sinbuol plodnosti zemjie, ča je u svima storima vrimenima jemalo veliku težinu. U puodnije od Brkate su i nojgušće posijone grške gomile sa grebima na Broču, a jemo i još jedna priča kojo se vežije na sve vo skupa: bonda od Brkate prima zopadu se zove "Počivala" a kako san ču radi tega jer su tuod stavijoli mrtve da počinedu pri nego su hi zakopovali. Je i to somo priča nastala prima imenu ili je ime nastalo prima mrtvima ča tuod počivodu kuo zno... Puno priči a malo mista; ča bi rekli naši stori: di jemo dima jemo i uognja...