Bhasha Research and Publication Centre (En), barata neregistara organizaĵo por indiĝenaj popoloj, lanĉis Popolan lingvo-enketon de Barato (angla mallongigo: PLSI). (Bhasha [bhaaŝaa] estas sanskrita vorto por "lingvo" uzata en pluraj barataj lingvoj.) Laŭ G N Devy (En), kiu kunordigas la iniciaton:

"En marto 2010, Bhasha organizis landan kunvenon en kiu partoprenis reprezentantojn de 320 lingvojn. [Notindas, ke Bhasha petis UEA-prezidanton P Dasgupta sendi mesaĝon - Giri.] En la fina sesio oni decidis fari Popolan lingvo-enketon de Barato kunlaborigonte lingvistojn, kulturajn organizaĵojn, kaj neregistarajn organizaĵojn kiuj fokusas pri lingvaj temoj.

"Jam komencis Bhasha la laboron. Efektive ĝi jam kreis lingvomapojn de tri himalajaj gubernioj barataj, kaj iniciatis laboron en tri pliaj gubernioj."

Unu el tiuj tri estas mia hejm-gubernio, Andhrapradeŝo. La 9an de aŭgusto - ĝuste je la Internacia tago de la indiĝenaj popoloj de la mondo (Ar, Cn, En, Es, Fr, Ru) - Bhasha kaj la hajderabada esplorcentro OUCIP (En) kunigis ĉ. 30 homojn de universitatoj, la registaro kaj la civila socio por kune cerbumi pri la projekto. Fine de la sesio, partoprenintoj konsentis verki artikolojn pri 16 lingvoj parolataj en la gubernio; la ceterajn oni traktos en posta fazo de la projekto.

Prof. Devy emfazis, ke temas pri popola enketo; oni celas "ekfoti" ĉiun lingvon kiel eble plej amplekse kiel ĝi hodiaŭ ekzistas, kaj fari tion uzante la parolantojn de tiuj lingvoj por verki la artikolon.

Ankaŭ estas interese vidi la fomaton de la proponataj eseoj. Krom baza, lingva priskribo, ĉiu enketo ankaŭ registros mallongan (milvortan) historion de la lingvo; mallongan bibliografion; kantojn kaj rakontojn (tradukante ilin en la hindian kaj la anglan); gentajn terminojn; proverbojn; kolorvortojn; konceptojn pri la spaco kaj la tempo, ktp: popola lingva antropologio, efektive.

Kiel pluraj partoprenintoj konsentis, grandega projekto kia ĉi tia promesas novajn sciojn kaj komprenojn pri la efikoj de la evoluigaj modeloj kiujn ni sekvas. Unu partopreninto parolis pri la bezono "elpensi sciokategoriojn" kiuj pli bone servos la baratan realaĵon.

Malnetaĵojn de tiuj 16 eseoj Bhasha volis havi jam en ses semajnoj. Pri la eldonada itinero (kaj eventuala disponigo surrete) mi ankoraŭ ne scias. Temas ja pri projekto ambicia. Mi raportos.