Bi san dite, skruoz moli jer se Brstilota spominjen somo di dica starijo od mene na Pijaci za njin viču "mulo", a on bi za njima tuko stinjen... Jure Brstilo kojega se jo spominjen umri je na 4 jenora 1969... smrzo se od zime, odveli su ga u Supetar u bolnicu ma mu ni već bilo pomoći. Kako je u nos običaj jude zvat po nadimku ne jedon put su me pitali kako mu je bilo prezime, od koje je race. Bi je siromah, živi je u kućici koju je naslidi od matere a to kućica je bila u današnjen Carevića dvuoru di je sad novo kuća od Joke Carevića. Ni jemo skoro ništa, a neka se govorilo da se zno ko mu je ćaća, kako ga ovi ni prizno ni jemo ni njegovo prezime nego mamino...
Brstilo je prezime a u Humac je došlo iz Medovog Doca. Nuono vega gore Jure je u Humac duošo za junoka, momak od 20 brž kojuo godišće veće, iza 1850. U to doba umri je Nikola Žilković pokojnega Ivana i iza njega je ostala udovica Vica, mlodo žena od 30 godišć sa molon ćeron Margariton. Kad jon je umri muž Vica još ni bila napunila 30, u kući njih tri ženske, je radi tega, je iz jubavi nepuna dvo godišća odkad je pokopala muža Vica se ponovo udola...

Jakov Brstilo (Jakova i N. Lovrinić) (1823 + 1887)
oženi je:
Šimu Brizić Huhnić (Tadije i Jelene Stipičić) udovicu Nikole Žilkovića pok. Ivana, (1825 + 1881).
Vica je Jakovu rodila troje dice:

Vica (1859 + 1942)

Jakobina (1863 + 1868)

Ivan ( 1870 + ?…) Ivon je išo u Ameriku i neznon ča je bilo daje. Radi puta u Ameriku su mater i sestra bile sa popon na sud jer je ovi Ivanu do šolde za kupit kortu, za pašoj a ovi je obećo njemu niku zemju ako ne bude mogo vrotit. Sud je prisudi kuontra popa ito malo sirotinje je ostalo Vici...

Vica je ostala u Huncu sa mamon a ni se udovala. Vanbračno je rodila četvoro dice: ćer i tri sina:
Vica (1870 + 1884 )
Jakov (1882 + ?) on je odveden u Split u sirotište i dane se nezno di je...
Juraj Mirko (1892 + 1969)
Barnaba ( 1900 + ... ) isto odveden u Split u sirotište i u anagrafe spominje: kažu da je umro u sirotištu.

Jure je bi isto odveden u sirotište ali su ga vazeli nose 1901. Obo njemu jemo veće priči, raznosi je poštu, ma obo temu diguod drugon prigodon.
Brstilotu su nojbližji po svuojti bili Žilkovići, Pere i Bloža nona mu je bila teta, i daje Huhnići, stori Tadija i Kapetona otac su mu bili drugi rojoci...