Počivala su terien izmeju vrha Brkate i Podbrkate, na puodnevnu bondu su Stranice. Put hi danas dili na Guornjo i Duonjo Počivala. Danas su to dilon starine, veće ili manje pokrivene buškon. Za njih su viezone dvi priče kojie obe jemodu fundamenat u smrti. Starijo priča se vežije na somo ime Počivol i na grške gomile (ilirske grobne humke) kojih u puodnije od Brkate jemo veće nego bilo di na Broču. Tako se ime Počivala tumači u priči da su tuod ostavijoli mrtve da počinedu pri nego bi ih otpratili na oni svit, odnosno zakopali ugreb. Brž bi se u tuon priči moglo iškat zoč je na Broču moli bruoj grebih u odnosu na vrime i bruoj svita koji je u temu vrimenu tribo živit po gradinami na otoku.

Drugo priča je ono ča se dogodilo Jakovu Tarošu. Na obe dvi ovie slike je spomenik ča su ga njemu podigila braća. Jakov je bi jedon od osmoro dice Velega Ive Taroša, šiest sinih i dvi ćere, rodi se je na 27. morča 1865. Dil ovie priče mi je ispričala neputa od Jakova teta Anka udona za Brneta, a dil san ču od mojih starijih. Evo ča se dogodilo: Na dvo vejače 1908 je učinilo veliko nevrime, snig, lied, pušavica... Taroševi su jemali konje i vajalo hi je puoć smistit. Kako mi je teta Anka pričala braća su bili u oštariji kad je poče snig, išli su iskat konje, a sa njima i Jakov. Čovik u snozi od 43 godišća ali je bi ćorov na jedno oko. Svakako su se braća razišla i Jakov se izgubi, ovi su ga zvoli ali se nisu nošli i oni su krenuli puldoma računajuć kako je i uon išo doma. Kud je uon sve luto nikad se nieće doznat, svakako doma ni duošo i onda su ga ujutro išli iskat. Isko ga je ko je mogo. Po nemu ča su di vidili Jakov je iškuć konje paso priko Brkate, duošo je u Podjomje i provo se sklonit u kućicu, kako su vrota bila zaklopjena ni mogo ulist nego je prid kućicon provo užgat ogonj, ča mu ni išlo za rukon. Kako i zoč na strihi je od kućice je ostavi jaketu ili već ča je jemo na sebi. Od Podjomji je išo prima Huncu a nošli su ga u Počivala smrznutega. Tako i piše da je umri na 2-3 vejače, jer ko je mogo znat siguro kad je to bilo u noći. Govorilo se da je Onte Lukieš bi u kućici u stranici tu nuoć i da je ču nikoga di viče ali onako kroz vitar i pušavicu ni mogo razaznat ni kuo ni čo ni odakle.

Spomenik koji su mu podigli braća još uvik stoji, od križa fali jedon komod, a na ovemu ča je na mistu piše: Vični pokoj JAKOVU TARAŠ... a ča je još pisalo moremo zamislit. Neka mu ovo bude na spomen a uon neka nojde vični pokoj kako su mu i braća poželila.