Na 11. jenora u Litvi san u butigi kupi sinu šipak, palo mi je napamet kad san ga vidi da mi je reko još vega lita priko telefona da bi ga voli provat. Kad san porti pul Litve stavi san jedniega u kufer iz Rovnega duoca, a ti je bi vec' dobro suh. Navečer san nojpri nače njemu ovega iz butige, bi je dobro zril tako da je jemo bokun gušta, a onda san poče čistit i jutoša iz Rovnega duoca...
Do san mu ga provat, a i jo san pozobo svuoj dil a onda su mi možjoni počeli pokazivot slike: borba Miko Livoguz, Frane Brbun, Rovni dolc, svieti Mikula, a još san bi dite. Dovna je to bilo, malo pokle je barba Miko umri, a uon je umri 1978, sreli se nikuda po selu jo i Frane Brbun. Govori uon meni da je ču da je Rovni dolac dopo nos i da bi voli znat je još živ šipak u njemu, pričo mi je kako je i uon ko dite sa drugima hodi koliendrot po Huncu za svietega Mikulu, od jedniega do drugega Mikule, a nojdražje mu je bilo puoc' u barba Mke Livoguza. Svak bi in čaguod bi do, suhih smokov, orihov, omiendul, ma je barba Miko u Rovni dolac jemo šipak, i bi bi čuvo frute sa njega za darivat dicu kad bi mu duošli koliendrot za svietega Mikulu. Je da je bi jutoš, ali ninder drugo nis mogo dobit šipak nego u Livoguza. To je bi puojam...

Poče san brojit: C'ac'a i Borba su znali za ti šipak ko dica, a ako ga i ni usodi pranuono Onte, bili su živi i uon i žena u doba kad su moji bili dica, tako da bi Pove bi peto generacija kojo ji frute sa vega šipka, bar se meni tako čini. Još jedna stvor, na 11. jenora 1959 u daleken Punta Arenu je umri brat od Mike Livoguza Mote, Ko momak je išo trbuhon za kruhon i vec' se nikad ni vroti doma, di kuo bi da bi svi počivali u miru...
Jes šipak jutoš, ma dabuojda ti mene i u dubokon starosti spominjo na vu priču i moju dicu i njihovu...