Baš me ćapalo pisat obo pulitici zodnje done, znon da to baš ni nojpametnije jer bi mogo komu stat na žuj ali čaje tuodje... pri por don san piso obo izborima, vega puta ću obo ničemu drugemu a veće od izbori viezono za naš Humac.

Kad san piso obo Skalinami; onima kud griemo na gruobje; spomienu san Joku Carevića ko "glavora" u mistu, to ga oće reć da je uon jemo nikakvu vlost. Ni Joko Carević jedini glavor za kojega san jo ču, ma imena za ovo ča ću jo sad napisat nimodu nikakve veze tako da hi nieću spominjot. Glavor je jemo zakonsku vlost u misto a držo je i vezu izmeju mista i općine ili kotara, a ti glavor je jemo i mogućnost da zatvori čovika u pržun na nikoliko don i to bez suda, e ali uon je bi ono ča bi se modiernin jezikon reklo "lokalna samouprava". Kakova je to "lokalna samouprava" bila? Malo je već onih ča se spominju tega oblika vlosti pri Drugega rata, a već nimo nikoga ko je u temu učestvovo, ali evo ča san jo ču:

Broč je nikada bi kotar koji se je dili na općine, otprilike ovako kako i danas, Humac je bi u općini Pučiškon, skoro sve isto... Kotar je vodi kotarski načelnik, a općinu poteštot; to je danas načelnik, oni su se birali na izborima... A di je tuod Humac? jemo je i Humac svoju vlost i to kako je danas modierno reć: vlost u tri dila: zakonodavnu, sudsku i izvršnu... To već ni ko danas, danas od tega nimo ničesa, ča se ne ponti još od kad je napisona "Povaljska listina" da Humac ni jemo nikoga ko bi sa njin upravijo a za to je kriva (za nevirovot) demokracija. Sad će kuoguod reć da san poludi , a brž i jeson... Moća se vrotit na lokalnu samoupravu:

Zakonodavna vlost u Huncu je bi Zbuor Hunčanih. Judi, građani ili kako van drogo,bi se sastajoli, rasprovijali ča bi tribalo učinit i dogovorali se kako. Na Zboru su se birali i izvršno i sudsko vlost, odnosno Glavor i Mirovni suci, a odredjivolo se i koji su Pošćici (danas bi se zvoli sudski procjenitelji). Zbuor se zadržo ko nočin odlučivonjo i u Austrijsken carstvu i u Krojevini i u Federativnon Jugoslaviji,a nikuo vrime i u Hrvaskon posli nego se osamostolila ko država... a ukinu ga je, da se ni nos ništa pitalo, Sabor pri destak godin i to baš Zokonon o lokalnon upravi i samoupravi. Odnosno u zokuon je stavi u ime samoupravu a ono ča je bila samouprava je ukinu. Sad već Zbora nimo jer ni po zokonu...

Sudska vlost su bili Mirovni suci, i njih se biralo na Zboru, a to je ono ča se danas uvodi u sudstvo ko proces mirenja. Mirovni suci nisu jemali mogućnost da prisudidu nego su na poziv jednie ili obe bonde u sporu provovali dovest zavadjene do dogovora i pomirit posvadjene. Bila je užonca da se birodu tri mirovna suca, i to su bili judi kojima je veliko većina mišćanih virovola da su pošteni i čistega obraza, a njihov mandat je bi ko i sucima bez ograničenjo, ako bi koji umri ili se zafoli na tuon čosti biro bi se novi. Nison ču da je kad koji sminjen radi "nesavjesne službe". Ako se ne varon zojno tri su bili Slavo Guočev, Frone Truto i Piere Huhnića, Sad već ni niedon od njih živ, ali kako nimo Zbora ne more se ni izabrat nove...

Izvršna vlost su bili Glavor i Mjesni Odbor. Već su komunisti smonjili ovlasti glavoru kojega su zaminili sa Odboron, ali njima je bi posol da rodidu ono ča je Zbuor odluči, a ako to nisu činili onda bi hi ovi bi mako ća i dove druge... Zbuor je izgubi vlost i kontruolu nad njima kad su uvedeni višestranački izbori za mjesne odbore, jedon putu četiri godine glasaš i ovi moredu činit tie četiri godine ča oćedu, bilo to dobro ili slabo; sad već ni tega nimo jer se Načelniku ni dolo raspisat izbore kad je zojnen Odboru isteko mandot od četiri godine. Već dvi godine nikor u Huncu nimo pravo potpisat čo u ime mista; barienko ne po zokonu!!!

Za pošćike se biralo jude koji su znali procinit nojpri šćetu a onda recmo i drva ili jematvu; njima je posol bi da se kad hi zovu procinu recmo koliku su šćetu napravili brovi u ničihovon ogradi, obično bi i oštećeni i okrivjeni pozivali svojega pošćika i onda bi oni utvrdili šćetu i koliko vajo plotit da se namiri. Ko pošćika se moglo zvat bilo koga ako je zno dobro procinit, ali na rič onih ča hi je biro zbuor oslonjo se i sud...

Da ne bi ovo ostalo somo tako rečeno u ariju za finit bin svitovo "Lokalnu vlost" a i sve Hunčane kojima je stalo do Hunca ovako:

Znon da po zokonu nimo Zbora, ali isto tako ni protiv zokona da se mi dogovorimo i sazovemo Zbuor i da izaberemo jude koji bi činili Mjesni odbor, ako se mi složimo prihvatiće ga i općina. A tien Odboru bi obaveza bila da svaki put kad se sastane i odlučije ovizo jude i da ko oće more duoć i reć ča misli, veće znodu tovor i čovik nego som čovik, ča bi naši stori rekli. Čini mi se da nas je malo da bi se korali izmeju sebe ko pasi i mrzili jedon drugega, nikad niećemo svi mislit isto ali svima bi tribo bit Humac na prvuo misto. Nažalost, koliko su non judi od voje maknut se a ne somo ogovorat za šankon, nieće se lako ovo stvor maknut sa mista, zato vas zoven da se somi pomaknemo i griemo naprid. Ne zoven vas da dote glos ni ovuon ni onuon partiji, nego da se ovuod u naše molo misto di smo svi doma ujedinimo i rodimo zajedno za boje svih nos. Moremo mi somi sastavit vlost na nočin kako gore piše, ako nan ne bude vajala prominimo je... Mirovni suci su nikakvi trošak, somo malo voje provat, a za provi sud uvik jemo vrimena. Joškotu Brtulincu ko vjećniku u općini svitujen da pozove jude jednu večer i reče in ča se čini u općini, neka se ne sekiro koliko će svita duoć, oni koga zanimo i oće čut duoće, koga čo muči reće, nieće se sve odma prominit ali će pomalo hodit na boje...