Diguod mi podu napamet nikie skoro gluparije. Evo vite meni škodi kad kuo prolije vodu bez potribe, recmo liti pere dvuor ili asvolt ispri dvuora; ko da će mu tako bit friškije,ili pere sude i onda počne ćakulat a voda teče na kanelu tuta fuorca... A neka nison stor, nemore mi iz glovie nikako nestat sllika iz ditinjstvo kad Trutini nisu jemali svoju gustirnu, a spominjen se i luoz ča su bile na mistu di nan je sad gustirna pri kuću. A za tu gustirnu ugrodit tribalo je zamišat puno betuna i to naruke, ni onda bilo mišalic. A za zamišat ti betun tribalo je donit vodu sa vele gustirne ispol gruobjo, svu tu vodu je moja Mater donila na glovi u maštilu... Jo tuod nison jemo upliva, ali san jon pri tega pomogo nossit vodu za u kužinu, Ona je nosila maštil a jo san za njuon nosi vodu u vojnišku puorciju od aluminija. E sad vi promislite koliko bi meni tribalo tih puorciji za oprat dvuor?

E! A kal san već spomienu tu Velu gustirnu vajo reć da je ona ugrojena posli Rata (drugega svjeskega) i da se rodila na fašine, tega se ne spominjen tako da nieću ni godinu reć, ali sve dokle ni Vodovod Broč poče vozit vodu sa autima odatle su se judi oskrbjivoli sa voduon, rastiezali gume i šćiedili tu vodu. Radi tie Gustirne san se bi jedonput zadi i sa barba Stipuon Tutića kad je uon reko da su njegoven ćaći komunisti odnili zemju di se ugrodila gustirna a jo san mu na to odgovori da to itako ni njegovo bilo nego je to uon odni mojon pokojnon noni Perini. Podguospa je bila Krivega Mike Vrsalovića a njega i ženu je meni Nona ašištila kad su ostarili i uon jon je ostavi Podguospu i Podrašieku (di san jo kuću ugrodi kašnje). Kad je Krivi Miko umri duošo je stori Tutić Visko ki mojuon Noni i reko: Perina meni je Krivi osto dužan ništo šuoldi, ako jemoš odakle dones do nedije ako nimoš jo ću vaziet Podguospu. Moja nona onda udovica ni jemala kruha za dici dat jist, altroke šuoldi za dat "Ćifutu" i vrotit pokuojnega Krivega Mikie dug, tako je ostala bez Podguospie. Ali meni već nikad ni Stipe reko kako su njima komunisti odnili zemju za napravit Gustirnu i pjuover... Neka mi se Tutići ne jidu radi vega ča san napiso, a noročito radi "ćifuta" jer i oni znodu da su storega Viskota zvoli "Ćifut " i "Židov" jer je držo butigu.

A žoč san ovo poče pisat? Danas je bi sprovod i puno judi je pasalo nimo tu gustirnu a pjuover pari koda je kozi ispo iz pehor. Je se kad kuo od Hunčani zapito oće kad nami opeta zatribat oto voda i bismo mogli bare iz zahvolnosti očistit i uriedit malo pjuover pri nego se pritvori u prašumu? Virujen da ne bi bilo grubo za vidit ni kad bi se vrotile nose skaline za do bucola i punpih, ne da će kuo već hodit punpat vodu nego radi zahvolnosti i lipega šesta...